Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Слово пастыря
-
Гостевая книга
-
Новости
-
Написать письмо
-
Поискъ

Русскіе проповѣдники

Указатель
А | Б | В | Г | Д | Е
-
З | И | І | К | Л | М
-
Н | О | П | Р | С | Т
-
Ф | Х | Ш | Ѳ | N
Біографіи

Слова и поученія

Въ день Святой Пасхи
-
На праздники Господскіе
-
На праздники Богородицы
-
На праздники святыхъ
-
На Четыредесятницу
-
На дни Цвѣтной тріоди
-
На воскресные дни
-
На Новый годъ (1/14 янв.)
-
На царскіе дни
-
Въ дни рукоположеній
-
Въ дни поминовеній
-
Военныя проповѣди

Святѣйшій Сѵнодъ

Грамоты и посланія

Проповѣди прот. Г. Дьяченко

Годичный кругъ поученій

Проп. архим. Пантелеимона

На всѣ воскресные дни года

Соборъ 1917-1918 гг.

Дѣянія Собора 1917-1918 гг.
-
Новые мученики Россійскіе

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 25 сентября 2016 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ДѢЯНІЯ СВЯЩЕННАГО СОБОРА ПРАВОСЛАВНОЙ РОССІЙСКОЙ ЦЕРКВИ 1917-1918 ГГ.

Приложеніе къ дѣянію XLIII.   

Чинъ поставленія Святѣйшаго Тихона, Патріарха Московскаго и Всея Россіи,
въ соборной церкви Успенія Пресвятыя Богородицы въ Богоспасаемомъ градѣ Москвѣ.

Въ лѣто отъ воплощенія Бога Слова 1917-е ноемвріа въ 21 день.



По входѣ нареченнаго Патріарха въ соборную церковь срѣтаютъ его по обычаю.

По молитвѣ же: Господи низпосли: обращается нареченный Патріархъ къ западу и благословляетъ, якоже обычай есть, поющимъ пѣвцемъ: Τὸν δεσπότην и прочая.

Егда почнутъ облачати нареченнаго Патріарха, поютъ пѣвцы: Свыше пророцы.

Облачаютъ же нареченнаго Патріарха, по чину святительскаго облаченія, во обычныя архіерейскія одежды, токмо прежде стихаря возлагаютъ параманъ патріаршескій, да возлагаютъ же поручи и палицу патріаршескія.

По облаченіи чтутъ часы и бываетъ литургія по обычаю.

По входѣ и обычнѣмъ кажденіи и пѣніи Εἰς πολλὰ: сущіи во олтари поютъ тропарь Пятидесятницѣ, а правый ликъ поетъ тропарь празднику.

Во олтари поютъ: Слава, кондакъ Пятидесятницѣ. Лѣвый ликъ поетъ: И нынѣ, кондакъ празднику.

И егда пропоютъ кондакъ сей, исходитъ протодіаконъ изъ святыхъ дверей и возглашаетъ: Господу помолимся.

Пѣвцы: Господи, помилуй.

Нареченный Патріархъ: Яко святъ еси, Боже нашъ:

И паютъ трисвятое по обычаю.

И возжигаютъ свѣщи вся предъ иконы, такожде же и сущимъ во олтари даютъ свѣщы, и всѣмъ людемъ.

По третіемъ трисвятомъ нареченный Патріархъ исходитъ изъ святыхъ дверей со крестомъ и дикиріемъ и благословляетъ люди и лики по обычаю, возглашая: Призри съ небесе, Боже:

Таже идетъ на горнее святительское мѣсто и благословляетъ трикиріемъ по обычаю, поющимъ во олтари священнослужителемъ: Святый Боже:

Егда же ликъ поетъ конечное трисвятое, тогда станутъ рядомъ съ нареченнымъ Патріархомъ старѣйшіи два митрополита и обращаяся къ востоку покланяются трижды съ Патріархомъ вкупѣ, и возмутъ митрополиты нареченнаго Патріарха подъ руки и возведутъ его на Патріаршее горнее мѣсто.

И обратятся нареченный Патріархъ и митрополиты къ западу, и возгласитъ единый изъ митрополитовъ: Вонмемъ.

А другій митрополитъ велегласно чтетъ:

Божественная благодать, немощная врачующи, оскудѣвающая восполняющи и промышленіе всегда творящи о святыхъ своихъ Православныхъ Церквахъ, посаждаетъ на престолѣ святыхъ первосвятителей Россійскихъ Петра, Алексія, Іоны, Филиппа и Ермогена Отца нашего Тихона, Святѣйшаго Патріарха великаго града Москвы и всея Россіи, во имя Отца. Аминь.

И абіе посаждаютъ митрополиты нареченнаго Патріарха на горнее сѣдалище, и воздвизаютъ его, вземше подъ руки.

И паки возгласитъ старѣй митрополитъ:

И Сына. Аминь.

И абіе посаждаютъ паки Патріарха на сѣдалище.

И воздвизаютъ митрополиты Патріарха подъ руки и третицею посаждаютъ его на мѣсто, возглашающу старѣйшу митрополиту:

И Святаго Духа. Аминь. Аксіосъ. Трижды.

И поютъ трижды: Аксіосъ, сущіи во олтари, и по нихъ правый ликъ съ людьми тожде поютъ.

Тогда единъ отъ архіереевъ станетъ во святыхъ дверехъ и, обращся къ востоку, глаголетъ велегласно ектенію сію:

Миромъ Господу помолимся.

О свышнемъ мирѣ и спасеніи душъ нашихъ, Господу помолимся.

О мирѣ всего міра, благостояніи святыхъ Божіихъ церквей и соединеніи всѣхъ, Господу помолимся.

О святѣмъ храмѣ семъ и съ вѣрою и благоговѣніемъ и страхомъ Божіимъ входящихъ вонь, Господу помолимся.

Сущіи во олтари на коеждо отъ сихъ прошеній поютъ:

Господи, помилуй, единожды.

Архіерей: Еще о спасеніи и заступленіи Святѣйшаго Отца нашего Тихона, нынѣ посаждаемаго Патріарха, рцемъ вси прилежно.

И поютъ сущіи во олтари: Господи помилуй, трижды.

Архіерей: Еще молимся о предстоящемъ Святѣмъ Соборѣ, рцемъ вси прилежно.

И поютъ сущіи во олтари: Господи, помилуй, трижды.

Архіерей: О избавитися намъ отъ всякія сворби:

Заступи, спаси, помилуй:

Сущіи во олтари поютъ на коеждо прошеніе: Господи, помилуй, единожды.

Архіерей: Пресвятую, пречистую:

Сущіи во олтари: Тебѣ, Господи.

Егда же глаголютъ ектенію сію, старѣй митрополитъ чтетъ молитву:

Владыко Вседержителю и Господи всяческихъ, Отче щедротъ и Боже всякія утѣхи! Ты сохрани пастыря съ паствою, зане ты еси всѣхъ благихъ вина, ты еси сила немощнымъ, ты еси помощникъ безпомощнымъ, ты еси врачъ душамъ и тѣлесемъ, Спаситель, чаяніе, и животъ, и воскресеніе, и вся яже къ вѣчному, спасительному бытію сочетавый намъ, ты вся, яже хощеши, можеши: избави убо, сохрани, покрый и огради насъ. Ты бо еси Господь господемъ, Владыка владыкомъ и Царъ царемъ: тѣмже и сему предсѣдящему даждь область и благодать рѣшити, яже подобаетъ рѣшити, и вязати, яже подобаетъ вязати. И Церковь Христа Твоего избранникомъ Твоимъ умудри и яко добру невѣсту сохрани ю.

Чтетъ же излегка молитву сію, во еже слышати близъ стоящимъ, возгласа же молитвы не чтетъ и возгласитъ его, егда скончаютъ ектенію.

Глаголемѣй же ектеніи, приходитъ къ Святѣйшему Патріарху ключарь со діаконы, имущими на блюдѣ сакъ и омофоръ патріаршескія, панагіи и патріаршескую митру.

И емлютъ подъяцы со Святѣйшаго шапку и прежде бывшій на немъ сакъ.

Митрополиты же, вземше сакъ отъ ключаря, даютъ цѣловати Патріарху, иподіаконы же облачаютъ его въ сакъ, возлагаютъ же и омофоръ и по немъ двѣ панагіи и крестъ.

Вземлютъ митрополиты митру патріаршую и даютъ цѣловати ю Патріарху, и возложатъ ю на главу его.

Другій же ключарь въ сіе время даетъ единому отъ діаконъ предносный крестъ патріаршескій и повелитъ стати съ нимъ одесную святыхъ вратъ, повелитъ же и примикирію стати ошуюю святыхъ вратъ со свѣщею двуплетенною, а прежде бывшая свѣща относится во олтарь сѣверными дверьми.

И егда изглаголетъ архіерей вышереченную ектенію, возгласитъ старѣйшій митрополитъ:

Ты бо всесиленъ и Вседержитель Богъ еси, и Твое есть царство и сила и слава Отца и Единороднаго Твоего Сына и всесвятаго и благаго и животворящаго Твоего Духа.

Ликъ: Аминь.

И исходитъ протодіаконъ въ святыя двери и станетъ лицемъ къ западу и кличетъ похвалу сице:

Святѣйшему Герману, Архіепископу Константинопольскому, Вселенскому Патріарху, многа лѣта.

Правый ликъ поетъ тожде.

Блаженнѣйшему Фотію, Патріарху Александрійскому, многа лѣта.

Лѣвый ликъ поетъ тожде.

Блаженнѣйшему Григорію, Патріарху Антіохійскому, многа лѣта.

Правый ликъ поетъ тожде.

Блаженнѣйшему Даміану, Патріарху Іерусалимскому, многа лѣта.

Лѣвый ликъ поетъ тожде.

Святѣйшему Тихону, отцу нашему и Патріарху Московскому и всея Россіи, многа лѣта.

Правый ликъ поетъ тожде.

Преосвященнымъ Митрополитамъ, Архіепископамъ и Епископамъ и всему Священному Собору Церкви Россійскія, многа лѣта.

Лѣвый лѣкъ поетъ тожде.

Богохранимѣй державѣ Россійстѣй, властемъ, воемъ ея и всѣмъ православнымъ христіаномъ, многа лѣта.

Правый ликъ поеть тожде.

И егда скончатъ многолѣтіе, глаголетъ протодіаконъ, вшедъ во олтарь: Вонмемъ.

И Святѣйшій Патріархъ: Миръ всѣмъ.

А лики съ людьми вкупѣ: И духови твоему.

Паки протодіаконъ: Премудрость. Вонмемъ.

И вторый діаконъ, емуже апостолъ чести, сказываетъ прокименъ апостолу, якоже обычай.

На велицѣмъ входѣ первѣе несутъ свѣщы двѣ въ надсвѣщницѣхъ пономари, посемъ свѣщу двуплетенную, по сихъ крестъ патріаршескій, митру и омофоръ, таже понесутъ діакони сіоны и по сихъ пойдутъ подъяцы съ дикиріемъ и трикиріемъ, діакони съ кадилы, діакъ съ рипидою, протодіаконъ съ святымъ дискосомъ, другій діакъ съ рипидою, третій діакъ такожде съ рипидою, архимандритъ съ потиромъ святымъ, и еще діакъ съ рипидою. По сихъ же идутъ архимандриты и священницы по обычаю.

Святѣйшій Патріархъ, вземъ святый дискосъ, глаголетъ:

Всѣхъ васъ православныхъ христіанъ да помянетъ Господь Богъ во царствіи Своемъ всегда, нынѣ и присно, и во вѣки вѣковъ.

Пріемляй же потиръ, Святителъ глаголетъ:

Да помянетъ Господь Богъ всѣхъ васъ во царствіи Своемъ всегда, нынѣ и присно, и во вѣки вѣковъ. И ино ничтоже.

По освященіи же святыхъ даровъ, егда скончаютъ Достойно: Святѣйшій возгласитъ:

Въ первыхъ помяни, Господи, Святѣйшія Патріархи и всяко епископство православныхъ, ихже даруй святымъ Твоимъ Церквамъ въ мирѣ цѣлыхъ:

Протодіаконъ, изшедъ во святыя двери и зря къ западу, кличетъ:

Германа святѣйшаго и Вселенскаго Патріарха, Фотія Александрійскаго, Григорія Антіохійскаго, Даміана Іерусалимскаго, благочестивыхъ православныхъ Патріарховъ, и великаго господина нашего, Святѣйшаго Тихона Московскаго и всея Россіи Патріарха, приносящаго святыя дары сія Господеви Богу нашему.

О Преосвященныхъ Митрополитѣхъ, Архіепископѣхъ и Епископѣхъ, о честнѣмъ пресвитерствѣ и еже во Христѣ діаконствѣ и о всемъ священническомъ чинѣ, о Богохранимѣй державѣ Россійстѣй, о побѣдѣ, о пребываніи мира, здравіи и спасеніи властей нашихъ, о мирѣ всего міра, и о благостояніи святыхъ Божіихъ церквей, и о избавленіи братій нашихъ, въ темницахъ и плѣненіи сущихъ, о поспѣшеніи и укрѣпленіи Христолюбиваго воинства, и о спасеніи людей предстоящихъ и помышляющихъ кійждо ихъ о своихъ согрѣшеніяхъ, и о всѣхъ и за вся.

По отпустѣ же литургіи, пѣвцы поютъ многолѣтны, и по сихъ тропарь и кондакъ храму.

Святѣйшій Патріархъ входитъ во олтарь и станетъ предъ святымъ престоломъ. И разоблачаютъ подъяци Патріарха. Ключари же принесутъ на блюдѣхъ: единъ мантію патріаршую, а другій клобукъ и вервицу. И пріимутъ мантію старѣйшіи митрополиты и дадутъ Патріарху цѣловати скрижали ея и возложатъ мантію на Патріарха, подъяци же управятъ и застегнутъ ю, и паки митрополиты пріемлютъ клобукъ патріаршескій и, давъ цѣловати его Патріарху, возлагаютъ и́ нань.

Посемъ единъ отъ митрополитъ вервицу дастъ Патріарху.

И исходятъ митрополиты на солею и по нихъ идетъ Святѣйшій.

Въ сіе же время дадутъ Митрополиту Кіевскому жезлъ Петра чудотворца, и Кіевскій Митрополитъ вручитъ жезлъ Патріарху на солеѣ, и здравствуетъ Святѣйшаго словомъ. А Святѣйшій, пріемъ жезлъ, говоритъ слово въ отвѣтъ, и по сихъ благословляетъ люди, глаголя:

Да сохранитъ Христосъ Богъ вся вы Своею Божественною благодатію и человѣколюбіемъ, всегда, нынѣ и присно, и во вѣки вѣковъ.

И возмутъ митрополиты Святѣйшаго и поведутъ его на мѣсто патріаршее ко столпу, и лики въ то время почнутъ пѣти: На гору Сіонъ взыди, благовѣствуяй: ирмосъ 5-я пѣсни Космина канона, яже въ недѣлю Ваій, и егда поставятъ Патріарха на мѣстѣ его, отходятъ митрополиты на амвонъ посредѣ церкве.

И пріидутъ подъяци къ Патріарху и облачатъ его въ малое облаченіе и поведутъ на мѣсто среди храма.

Протодіаконъ речетъ: Благослови, Владыко.

Патріархъ: Благословена слава Господня отъ мѣста святаго сего всегда, нынѣ и присно и во вѣки вѣковъ.

И починаютъ пѣти молебенъ, якоже обычай, и исходятъ изъ церкве со кресты.

Источникъ: Священный Соборъ Православной Россійской Церкви. Дѣянія. Книга IV: Дѣянія XLI-LI. — Изданіе Соборнаго Совѣта. — Пг., 1918. — С. 118-122.

/ Къ оглавленію /


Наверхъ / Къ титульной страницѣ

0