Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Слово пастыря
-
Гостевая книга
-
Новости
-
Написать письмо
-
Поискъ

Русскіе проповѣдники

Указатель
А | Б | В | Г | Д | Е
-
З | И | І | К | Л | М
-
Н | О | П | Р | С | Т
-
Ф | Х | Ш | Ѳ | N
Біографіи

Слова и поученія

Въ день Святой Пасхи
-
На праздники Господскіе
-
На праздники Богородицы
-
На праздники святыхъ
-
На Четыредесятницу
-
На дни Цвѣтной тріоди
-
На воскресные дни
-
На Новый годъ (1/14 янв.)
-
На царскіе дни
-
Въ дни рукоположеній
-
Въ дни поминовеній
-
Военныя проповѣди

Святѣйшій Сѵнодъ

Грамоты и посланія

Проповѣди прот. Г. Дьяченко

Годичный кругъ поученій

Проп. архим. Пантелеимона

На всѣ воскресные дни года

Соборъ 1917-1918 гг.

Дѣянія Собора 1917-1918 гг.
-
Новые мученики Россійскіе

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

Д

Свт. Димитрій, митр. Ростовскій († 1709 г.)
Рѣчь преосвященнаго Димитрія, Митрополита Ростовскаго, въ Ростовъ на престолъ свой пришедшаго.

Бога вся на пользу строющаго изволеніемъ, пресвѣтлѣйшаго же Монарха, благовѣрнаго, великаго Государя нашего, Царя и великаго Князя   П е т р а А л е к с і е в и ч а,   всея великія и малыя и бѣлыя Россіи Самодержца повелѣніемъ, и всего освященнаго собора соизволеніемъ и благословеніемъ, мое недостоинство здѣ на престолъ Пречестнѣйшія Митрополіи Ростовскія и Ярославскія пришедъ, о возлюбленніи словеснаго Христова стада овцы, мирь вамъ глаголю! Миръ пречестнѣйшему сему Пречистыя Матере Божія храму, миръ Богоспасаемому граду Ростову, миръ Богоспасаемому граду Ярославлю, миръ Богоспасаемому граду Угличу, и всѣмъ Богоспасаемымъ Епархіи сея церквамъ, и градовомъ, миръ и благословеніе! Миръ жительству и сожитію вашему, миръ домовомъ вашимъ, миръ сердцамъ вашимъ, якоже и Апостолъ глаголетъ: и миръ Божій да водворяется въ сердцахъ вашихъ, въ оньже и звани бысте (Кол. 3, 15)!

Да не смущается сердце ваше о моемъ къ вамъ пришествіи: дверьми бо внидохъ, а не прелазяй инуды. Не искахъ, но поисканъ есмь, и не вѣдахъ васъ, нижé вы мене вѣдасте: судьбы же Господня, бездна многа, тыя послаша мя къ вамъ. Азъ же пріидохъ, не да послужите ми, но да послужу вамъ, по словеси Господню: хотяй быти въ васъ первый, да будетъ всѣмъ слуга (Матѳ. 20, 26-27).

Пріидохъ къ вамъ съ любовію. Реклъ быхъ, яко пріидохъ, якоже отецъ къ чадомъ; но паче реку, пріидохъ якоже братъ къ братіи, якоже другъ къ любезнымъ другомъ. Ибо и Христосъ Господь не стыдится насъ братіею нарицати: вы друзи мои, глаголетъ; не ктому васъ нарицаю раби, но друзи (Іоан. 15, 14-15). А еже честнѣе и удивительнѣе, яко и отцами себѣ нарицаетъ любимыя Своя, глаголя: сей Ми есть и отецъ, и мати, иже творитъ волю Отца Моего небеснаго (Матѳ. 12, 49). Убо и ваша любовь есте ми и отцы, и братія, и друзи.

Аще же и отцемъ мя воззовете, то азъ апостольски къ вамъ отвѣщаю: чадца моя, имиже болѣзную, дондеже вообразится въ васъ Христосъ (Гал. 14, 19).

Пріидохъ путемъ тѣмъ, имже пріиде иногда изъ Кіева сѣмо, иже во святыхъ отецъ нашъ Исаія, здѣшній Ростовскій чудотворецъ. Той на сіе мѣсто принесе благословеніе отъ благодати, свыше изліянной на новый Аѳонъ, или паче рещи, на новый Іерусалимъ, на Кіевопечерскія горы. Того убо святаго Исаіи слѣды, и азъ грѣшный изъ Кіева пришедъ, глаголю: да будетъ на мѣстѣ семъ благословеніе Божіе, Богородичино, преподобныхъ отецъ нашихъ Антонія и Ѳеодосія, и прочихъ чудотворцевъ Печерскихъ, въ нетлѣніи почивающихъ, всю же вселенную чудесы озаряющихъ!

Радуюся духомъ, пришедъ въ сей градъ, въ сей домъ, егоже здѣшніи Чудотворцы стопами святыхъ своихъ ногъ освятиша, молитвами оградиша, богоугоднымъ житіемъ украсиша, подвигами и трудами возвеличиша, и премногою святынею прославиша.

Радуюся духомъ, видя таковое собраніе, изрядное словесныхъ овецъ Христовыхъ стадо, еже пасетъ самъ пастырей Начальникъ Христосъ, еже соблюдаетъ Пречистая и Преблагословенная Дѣва Марія, мати Христа Бога нашего: еже назираютъ древнѣйшіи пастыри, Архіереи Божіи и великіе свѣтильники — Леонтій, Исаія, Игнатій, Іаковъ, и прочіи, иже въ здѣшней сей Епархіи угодники Божіи, престолу Божію предстоящіи, о насъ же выну ко Господу молящіися.

Радуюся духомъ, видя таковый віноградъ, егоже насади десница Вышняго, егоже напои благодать Духа Святаго, егоже возрастиша труды прежде бывшихъ Архіереовъ; егоже посѣщаетъ Самъ Христосъ со Пречистою Своею Богоматерію, и источаетъ веселія духовнаго віно.

Молю же и молити долженствую пастырей Начальника, Владыку Христа, да соблюдетъ сіе свое стадо цѣло и невредимо отъ волковъ видимыхъ и невидимыхъ; да ни едина овца отъ сея Христовы и Богородичиной ограды пойдетъ въ заблужденіе и погибель. Да ни едина овца похищена будетъ адскимь звѣремъ, да ни едина овца претворится въ козлище; но паче изъ козлищь да претворится во овцы, и вси съ благословенными овцами деснаго стоянія да сподобятся во время пришествія Господня.

А понеже Архіерей Великій, небеса прошедый, мене аще и недостойнаго поставилъ есть вамъ пастыря, и увѣрилъ мя спасеніе ваше, еже со страхомъ и трепетомъ, яко отвѣтъ воздати о васъ имущь, пріемлю: азъ убо мою должность, яже къ вамъ, знати и хранити имамъ; вы же свою должность, яже ко мнѣ, знати и хранити имате.

Долженъ есмь помощію Божіею, по наставленію Апостольскому, немощи немощныхъ носити, и не себѣ угождати, но комуждо васъ во благое къ созиданію: ибо и Христосъ не себѣ угоди (Рим. 15, 1 и дал.). Долженъ есмь вразумляти безчинныя, утѣшати малодушныя, заступати немощныя, долготерпѣливъ быти ко всѣмъ: долженъ есмь добрыя любити, злыя же съ милованіемъ наказывати, о всѣхъ пользѣ пещися, всѣмъ спасенія тщательно искати, о всѣхъ молитися.

Должни же и вы, о возлюбленніи по Христѣ Господѣ, мене аще и грѣшнаго пастыря своего знати, любовь же нелицемѣрную, почитаніе нелестное, и повиновеніе подобающее являти, и со усердіемъ творити.

Аще повелѣлъ есть Богъ, да буду вамъ отецъ: вы убо будите ми присніи чада. Аще изволилъ есть Христосъ, да буду въ васъ первенствуяй: вы убо будите кротцыи и смиренніи подъ управленіемъ первенствующаго.

Аще поставилъ мя есть Духъ Святый вамъ пастыря: вы убо будите ми истинныи овцы, овцы слушающіи, а не преслушающіи гласа пастыря своего.

Аще учителя вамъ Богъ поставилъ есть мя: то пріидите чада, послушайте мене, страху Господню научу васъ (Псал. 33, 12).

Аще наставника вамъ даде мя, то повинуйтеся наставнику вашему, и покаряйтеся: мнѣ бо ввѣрено есть доброе о душахъ вашихъ попеченіе, аки слово воздати хотящу, да съ радостію сіе творю, а не воздыхающи (Евр. 13, 17).

Егда узрю вы добрую имущихъ совѣсть во всемъ, начну радоватися: егда же узрю злую имущихъ совѣсть, во всемъ начну воздыхати. Егда увижду вы истинныи быти Христовы овцы, на десно грядущія, буду радоватися: егда же увижду вы къ козлищной части уклоняющихся, буду воздыхати. Егда обрящу въ васъ по Бозѣ сущую любовь, смиреніе, повиновеніе, попремногу возрадуюся: аще же обрящу нелюбовь, презорство, непокореніе, много воздыхати имамъ. О добронравномъ и богоугодномъ вашемъ житіи возрадуюся, о развращенныхъ же воздохну; вы же пецытеся, да съ радостію пасу васъ, а не воздыхающи. Аще бо убѣдите мя воздыхати о васъ, не полезно вамъ будетъ сіе.

Богъ же Преблагій, хотяй всѣмъ человѣкамъ спастися, и въ разумъ истинный пріити, Той да наставитъ вы на путь Свой, во еже творити волю Его благую и совершенную, и во всемъ Ему угождати; да не посрамлены и не постыжденны предстанете страшному Того суду. Да возрадуюся же и азъ недостойный пастырь, и реку ко Владыцѣ Христу: се азъ и дѣти, яже далъ ми еси (Ис. 8, 18)! Нынѣ же потщимся вси купно уклоняющеся отъ зла, творити благостыню, да угодны очесамъ Господнимъ явимся.

Благодать же Господа нашего Іисуса Христа съ вами, и любы моя со всѣми вами. Аминь.

Источникъ: Сочиненія святаго Димитрія, Митрополита Ростовскаго. Часть первая, содержащая въ себѣ разныя небольшія сего Святителя творенія, съ присовокупленіемъ житія его и келейныхъ записокъ. — Изданіе седьмое. — М.: Въ Сѵнодальной Тѵпографіи, 1848. — С. 55-59.

/ Къ оглавленію /


Наверхъ / Къ титульной страницѣ

0