Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Слово пастыря
-
Гостевая книга
-
Новости
-
Написать письмо
-
Поискъ

Русскіе проповѣдники

Указатель
А | Б | В | Г | Д | Е
-
З | И | І | К | Л | М
-
Н | О | П | Р | С | Т
-
Ф | Х | Ш | Ѳ | N
Біографіи

Слова и поученія

Въ день Святой Пасхи
-
На праздники Господскіе
-
На праздники Богородицы
-
На праздники святыхъ
-
На Четыредесятницу
-
На дни Цвѣтной тріоди
-
На воскресные дни
-
На Новый годъ (1/14 янв.)
-
На царскіе дни
-
Въ дни рукоположеній
-
Въ дни поминовеній
-
Военныя проповѣди

Святѣйшій Сѵнодъ

Грамоты и посланія

Проповѣди прот. Г. Дьяченко

Годичный кругъ поученій

Проп. архим. Пантелеимона

На всѣ воскресные дни года

Соборъ 1917-1918 гг.

Дѣянія Собора 1917-1918 гг.
-
Новые мученики Россійскіе

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 21 августа 2017 г. Сейчасъ на порталѣ посѣтителей - 24.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

Д

ДУХОВНАЯ ГРАМОТА
Святаго Димитрія, Митрополита Ростовскаго, новаго Чудотворца, юже онъ прежде смерти своея рукою написа сице:

Во имя Отца, и Сына, и Святаго Духа, аминь.

Се азъ смиренный Архіерей Димитрій, Митрополитъ Ростовскій и Ярославскій, слушая гласа Господа моего во святомъ Евангеліи глаголющаго: будите готови, яко въ оньже часъ не мните, Сынъ человѣческій пріидетъ (Матѳ. 24, 44). Не вѣсте бо, когда Господь пріидетъ, въ вечеръ, или въ полунощь, или въ пѣтлоглашеніе, или утро: да не пришедъ внезапу, обрящетъ вы спящія (Марк. 13, 35-36). Того гласа Господня слушая и бояся, еще же и частѣ недугованіемъ одержимь бывая, и день отъ дне изнемогая тѣломъ, и чая на всяко время онаго Господемъ глаголаннаго нечаяннаго часа смертнаго, и по силѣ моей приуготовляяся ко исходу отъ сея жизни, судихъ сею Духовною грамотою моею вѣстно сотворити всякому, иже восхощетъ по кончинѣ моей взыскивати имѣнія моего келейнаго: во еже бы не трудитися ему вотще, ни изтязовати служившихъ мнѣ Бога ради, да вѣсть мое сокровище и богатство, еже отъ юности моея не собирахъ. (Сіе не тщеславяся реку, но да искателямъ моего по мнѣ имѣнія вѣстно сотворю). Отнелѣже бо пріяхъ святый иноческій образъ, и постригохся въ Кіевскомъ Кирилловскомъ монастырѣ, въ осмьнадесятое лѣто возраста моего, и обѣщахъ Богови нищету извольную имѣти, отъ того времени даже до приближенія моего ко гробу, не стяжавахъ имѣнія и мшелоимства, кромѣ книгъ святыхъ, не собирахъ злата и сребра, не изволяхъ имѣти излишнихъ одеждъ, никакихъ либо вещей, кромѣ самыхъ нуждъ: но нестяжаніе и нищету иноческую духомъ и самымъ дѣломъ, по возможному, соблюсти тщахся, не пекійся о себѣ, но возлагаяся на промыслъ Божій, иже никогдаже мя остави. Входящая же въ руцѣ мои отъ благодѣтелей моихъ подаянія, и яже на начальствахъ келейный приходъ, тáя истощевахъ на мои и на монастырскія нужды, идѣже бѣхъ во Игуменѣхъ и Архимандритѣхъ. Такожде и во Архіерействѣ сый, не собирахъ келейныхъ (яже не многи бяху) приходовъ; но ово на мои потребы та иждивахъ, ово же на нужды нуждныхъ, идѣже Богъ повелѣ.

Никтоже убо да трудится по смерти моей испытуя, или взыскуя каковаго либо келейнаго моего собранія: ибо нижé на погребеніе что оставляю, ни на поминовеніе, да нищета иноческая наипаче на кончинѣ явится Богу. Вѣрую бо, яко пріятнѣе Ему будетъ, аще и едина цата по мнѣ не останетъ, неже егда бы многое собраніе было раздаваемо.

И аще мене тако нища никтоже восхощетъ обычному предати погребенію, молю убо тѣхъ, иже свою смерть памятствуютъ, да отвлекутъ мое грѣшное тѣло во убогій домъ, и тамо между трупіями да повергутъ е.

Аще же владычествующихъ изволеніе повелитъ мя умерша погребсти по обычаю, то молю Христолюбивыхъ погребателей, да погребутъ мя въ монастырѣ святаго Іакова, Епископа Ростовскаго, во углѣ церковномъ, идѣже мѣсто ми назнаменовахъ, о семъ челомъ бью.

Изволяяй же безденежно помянути грѣшную мою душу въ молитвахъ своихъ Бога ради, таковый и самъ да помяновенъ будетъ во царствіи небесномъ; требуяй же за поминовеніе мзды, то молю, да не поминаетъ мя нища, ничтоже на поминовеніе оставльша. Богъ же да будетъ всѣмъ милостивъ, и мнѣ грѣшному во вѣки. Аминь!

Сицевый завѣтъ, се моя духовная грамота; сицево о имѣніи моемъ извѣстіе. Аще же кто, извѣстію сему не емля вѣры, начнетъ со испытаніемъ искати по мнѣ злата и сребра: то аще и много потрудится, ничтоже обрящетъ, и судитъ ему Богъ.

Писася въ богоспасаемомъ градѣ Ростовѣ, въ дому Архіерейскомъ; въ лѣто 1707, Априллія въ 4 день.

Источникъ: Сочиненія святаго Димитрія, Митрополита Ростовскаго. Часть первая, содержащая въ себѣ разныя небольшія сего Святителя творенія, съ присовокупленіемъ житія его и келейныхъ записокъ. — Изданіе седьмое. — М.: Въ Сѵнодальной Тѵпографіи, 1848. — С. 47-49.

/ Къ оглавленію /


Наверхъ / Къ титульной страницѣ

0