Русскій Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Слово пастыря
-
Гостевая книга
-
Новости
-
Написать письмо
-
Поискъ

Русскіе проповѣдники

Указатель
А | Б | В | Г | Д | Е
-
З | И | І | К | Л | М
-
Н | О | П | Р | С | Т
-
Ф | Х | Ш | Ѳ | N
Біографіи

Слова и поученія

Въ день Святой Пасхи
-
На праздники Господскіе
-
На праздники Богородицы
-
На праздники святыхъ
-
На Четыредесятницу
-
На дни Цвѣтной тріоди
-
На воскресные дни
-
На Новый годъ (1/14 янв.)
-
На царскіе дни
-
Въ дни рукоположеній
-
Въ дни поминовеній
-
Военныя проповѣди

Святѣйшій Сѵнодъ

Грамоты и посланія

Проповѣди прот. Г. Дьяченко

Годичный кругъ поученій

Проп. архим. Пантелеимона

На всѣ воскресные дни года

Соборъ 1917-1918 гг.

Дѣянія Собора 1917-1918 гг.
-
Новые мученики Россійскіе

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 20 ноября 2017 г. Сейчасъ на порталѣ посѣтителей - 25.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

А

Адріанъ, патр. Всероссійскій († 1700 г.)
Слово на погребеніе Государыни Царевны и Великія Княжны, схимонахини Анѳисы, бывшія Анны Михайловны, говоренное Октября 29-го дня 1692 года
[1].

Помяни, яко смерть не замедлитъ. (Словеса Іисуса Сирахова, во главѣ 14-й).

Понеже въ человѣческой жизни находитъ смертная скорость; бодрость намъ имѣти всегда, благословенніи христіане, должно есть. Сице бо многи суть вещи во вселеннѣй, зѣло скорое дѣющія теченіе; но ни едина борзости смертнѣй равнятися можетъ. Скоро рѣки быстрыя текутъ въ морскую пучину; но скорѣе тѣхъ корабли по морю, и облацы по аеру (воздуху) вѣтромъ носими бываютъ; быстро летитъ стрѣла изъ тугаго лука, сильною испущенная рукою; дивно есть во скорости теченія своего солнце, занеже во двадесятъ четыре часа всю вселенную обтекаетъ: но дивнѣйшая всѣхъ есть смерть, яко во единомъ мгновеніи ока и на земли убиваетъ, и на мори погружаетъ, и во огни сожигаетъ, и на воздусѣ удушаетъ; во единой чертѣ времени коситъ, яко траву, человѣки на востоцѣ, и жнетъ, яко класы, на западней странѣ; въ тожде время, во странахъ южныхъ грады, яко винограды, истребляетъ и на ливѣ сильныя люди, яко древеса, посѣцаетъ. Ей! не тако умъ человѣческій скоро можетъ вселенную облетати, якоже смерть съ косою своею.

Оле скорости неизреченныя! Оле предивныя борзости смерти! И кто убо есть, да возможетъ бѣгствомъ спастися отъ нея? Ей! ни единъ отъ земнородныхъ; ибо всѣмъ лежитъ человѣкомъ единою умрети. Не гонзати убо ея требѣ намъ есть, но готовымъ на пришествіе ея выну (всегда) быти, да не како, яко древо безплодное обрѣтши, посѣчетъ, и во огнь ввержетъ геенскій: но, яко добрыми плоды обильное пресадитъ въ рай небесный. Коимъ паки образомъ къ ней готовитися достоитъ, и яко готова бяше новопреставленная раба Божія, Благородная Госпожа Царевна схимонахиня Анѳиса, и пойде на вѣчное пребываніе, нынѣ въ вашу пользу глаголати хощу.

Предвидѣнныя стрѣлы меньше уязвляютъ человѣка, и ожиданный ратникъ меньше вредотворитъ (дѣлаетъ вредъ), православніи слушателіе: подобнѣ и смерть выну во умѣ содержанная (если непрестанно помышляемъ о ней), малъ вредъ содѣваетъ. Тѣмже первое комуждо, уготовленіе себе ко смерти имать быти: поминаніе послѣднихъ смерти, суда, небесъ и геенны: ибо якоже пути ятися хотящіи прежде путь свой претекаютъ мыслію, нежели ногами, мысляще, како преходити безвредно возмогутъ глубокія рѣки, высокія горы и лѣса, разбойники въ себѣ содержащіи: тако путь вѣчности воспріяти имущему христіанскому человѣку, путь же бѣдный, мрачный, стропотный, разсуждати достоитъ, како полезно прейти возможно путь смерти, путь множествомъ разбойникъ душевныхъ исполненный, путь, во егоже кончинѣ добрымъ путникамъ доброе пристанище небесное уготовася, лукавымъ же дебрь геенская положися; разсуждати приличествуетъ, яко тѣло имать въ темномъ, смрадномъ и тѣсномъ заключитися гробѣ, въ пищу червіямъ и на снѣденіе тлѣнію, душа паки имать предстати страшному Божію судилищу, изтязана быти о всѣхъ содѣянныхъ во плоти дѣломъ, словомъ и помышленіемъ, егоже истязанія ужасаяся, Богоотецъ Давидъ вопіяше къ Богу: Господи! не вниди въ судъ съ рабомъ Твоимъ, яко не оправдится предъ Тобою всякъ живый. Сей путь смертный хотяще святіи и мудріи мужіе претещи безбѣдно, прежде смерти прилежаху послѣдняя размышляти. Іоаннъ святый Милостивый повелѣ за живота своего гробъ себѣ помалу на всякъ день готовити, и единому отъ служителей воспоминати себѣ, да гробъ несовершенный велитъ въ совершеніе приводити. Царь же нѣкто повелѣ гробъ себѣ содѣяти, и всѣми погребательными устроити, и выну съ собою возити, аможе либо путешествовати прилучашеся, се-же дабы смертнаго часа забвенію не предати.

То само Церковь мати намъ выну содѣваетъ, егда при храмѣхъ Божіихъ мертвыя погребаетъ, поминанія имъ творитъ, и гробища (памятники) созидати устави, да сія выну видяще, смерти не забудемъ. Убо тщимся мыслію смерть свою предваряти, гробы посѣщати, погребаемымъ послѣдовати и часто мыслію умирати, да единою самымъ дѣломъ добрѣ умрети возможемъ.

Второе ко смерти уготовленіе есть оно, еже велегласный Исаія завѣща благочестивому царю Езекіи отъ Господа: сія глаголетъ Господь: устрой о дому твоемъ, еже есть: расположи завѣтомъ, имѣнія твоя раздѣли, богатство твое на жену, дѣти, домочадцы, на церковь, на обители святыя, на нищія, вдовицы, и плѣнныхъ на искупленіе, прежде всѣхъ-же сихъ воздаждь должное, аще не хощеши со онымъ рабомъ лукавымъ вверженъ быти во тьму кромѣшную, дондеже воздаси послѣдній кодрантъ. Уподобися Закхею, рекшему ко Господу: се полъ имѣнія моего, Господи, даю нищимъ, и аще кого чимъ обидѣхъ, возвращу четверицею. Остави по себѣ миръ дому твоему, якоже Христосъ Господь миръ Церкви своей, внегда рещи Ему: миръ Мой оставляю вамъ; а не оставляй вины прѣнія, расколовъ и ненависти. Устрой же домъ твой благовременнѣ, донележе очеса не помрачатся, умъ не оскудѣетъ и руцѣ не ослабѣютъ. Устрой благочинно, и благоразумно, не по любви и страсти записуя, но по долгу и чину, ближнія дальнимъ предпочитая, и домашнія страннымъ. Устрой лучше своима, нежели чуждыма рукама: ибо аще ты самъ сего не сотвориши, но чего либо ради пренебрежеши; кто же по смерти вѣрнѣе тебѣ послужитъ? Такожде устрояя о имѣніи, устрой душу твою ко Господу; да тако, по глаголу Григорія святаго, яко зрѣлое яблоко, легко, волею и благоохотнѣ отъ древа жизни сея отпадеши; а не нуждою, со тщетою твоею отъ міра отторгнутъ будеши.

Третіе уготовленіе ко смерти есть, еже противу душевному врагу вооружитися. Тайнами Божественными, да ни отъ единыя страны возможемъ уязвитися. На сей подвигъ, или борьбу, вооружаетъ Церковь мати когождо сына своего, якоже древле Саулъ Давида противу Голіаѳу. Обложи бо Саулъ Давида одеждою, и шлемъ мѣдянъ возложи на главу его; аще и не хотяше онъ тако подвизатися, но въ духовное облечеся оружіе, еже есть упованіе во имя Господа Бога Израилева. Подобнымъ образомъ Церковь мати, облекаетъ чада своя одеждою Христовою, егда таинъ Евхаристіи Божественныя общники дѣетъ, и аки во Христа облекаетъ, да Его заслугами чада благодать обрящутъ. Подражаетъ мати наша матерь Іакова патріарха, яже желающи отъ Исаака Іакову общенія благословенія, одѣя ѝ (его) ризою Исавлею первороднаго его, зѣло благою и добровонною, и кожами покры руцѣ его, да всячески первороднаго брата являетъ Исава; и тако благословеніе получи. Сему подобнѣ Церковь мати, видящи недостоинство дѣлъ нашихъ, ко еже пріяти намъ отъ Бога Отца благословеніе, облекаетъ ны во Христовы одежды, иже есть первородный во многихъ братіяхъ, егда сподобляетъ Божественнаго Причащенія: тогда бо христообразни бываемъ; и есть та одежда зѣло блага и добровонна предъ небеснымъ Исаакомъ, еяже не возлюбити не можетъ, и не вѣсть отрещися благословенія. Напослѣдокъ якоже Саулъ Давиду шлемъ мѣдянъ; тако Церковь умирающему чаду возлагаетъ шлемъ Елеосвященія на главу его, да яко шлемъ послѣжде на главу возлагается въ защищеніе главы, тако тайна сія святая, въ послѣдокъ жизни употребленная, защититъ умирающаго отъ стрѣлъ искушенія демона лукаваго. Никто-же убо да обрящется не хотяй шлема сего воспріяти спасеннаго, аще хощетъ крѣпость и защищеніе въ послѣдней борьбѣ имѣти.

Четвертое ко смерти уготовленіе есть, еже взяти съ собою оружіе на пораженіе врага, излиха во время смерти навѣтующа, коварствующа и смущающа? Вооружися древле Голіаѳъ, грядый на Давида: вооружается зѣло крѣпцѣ и демонъ на умирающа человѣка. Но Давидъ взя жезлъ свой, егоже выну въ руку си имяше, и избра себѣ пять свѣтлыхъ каменій отъ потока, еже изъ пращи на враги вергати я. Тако да возметъ всякъ, приближаяйся ко смерти, жезлъ спасенія своего въ руцѣ си, еже есть крестъ Господень, егоже излиха боится демонъ, якоже песъ обыче того же зла боятися, имже единою уязвися. Того ради умирающимъ крестъ Господень обыкохомъ даяти къ лобзанію, и знаменатися крестообразно увѣщаемъ, или сами знаменуемъ умирающа, да лукавый демонъ, видя на немъ сіе знамя, приближатися убоится. Еще, яко Давидъ жезла своего и прежде брани употребляше, выну бо прирученъ ему бяше, тако и мы да навыкнемъ, здрави суще, крестъ Господень благочинно употребляти, да и во время брани возъумѣемъ полезно употребляти его. Къ тому должно умирающему краткія молитвы, яко каменцы свѣтлыя, отъ потока божественнаго Писанія взятыя, изъ пращи устъ на врага вергати, якоже буди во образъ сея: Господи Іисусе Христе Боже нашъ, помилуй мя грѣшнаго. Вторая сія: О, Пресвятая Госпоже Богородице! спаси мене грѣшнаго. Третія оная: Боже, очисти мя грѣшнаго и помилуй мя; Создавый мя Господи, помилуй; безъ числа согрѣшихъ Тебѣ, прости мене грѣшнаго. Четвертая оная: очи мои выну ко Господу, яко Той исторгнетъ отъ сѣти нозѣ мои. Пятая отъ самаго Христа Господа изреченная: Отче, въ руцѣ Твои предаю духъ мой, и иныя тѣмъ подобныя, яже зѣло скоро и дѣйственно адскаго поражаютъ Голіаѳа. Тоже дѣюще, подобаетъ отложити попеченіе плоти и земныхъ вещей, прилежати же о души, вещи безсмертнѣй, и о небеси; подобаетъ и сія добродѣтели: вѣру, надежду и любовь, сокрушеніе сердца и терпѣніе приложити. Сія бо суть пять камни свѣтли, зѣло угодни ко еже демона побѣдити.

Пятое уготовленіе есть, еже ложе свое цвѣты добродѣтелей украсити, и уготовати себѣ добрыми дѣяньми гнѣздо на небеси. Феникса подражати достоитъ, иже, по свидѣтельству Кирилла святаго [2], егда чувствуетъ смерть свою близъ быти, первое созидаетъ гнѣздо изъ древесъ благовонныхъ и посредѣ ихъ возлегаетъ. Таже солнцу наипаче палящу, обращаетъ къ нему очеса своя, и крилома двизаніе имать, даже теплотою его возжигается, и весь согараетъ, и въ пепелъ обращается, изъ негоже послѣжде червь исходитъ, и въ новаго феникса превращается. Зѣло изрядный есть праведнича воскресенія образъ, еже хотяй улучити, да собираетъ себѣ благовонная добродѣтелей древеса, чрезъ всѣ времена жизни своея, да возляжетъ же тщаніемъ самъ на нихъ въ жертву Богу, и очеса намѣренія да обратитъ къ Нему, яко ко истинному солнцу, и да движетъ крилѣ желанія си (своего), еже разрѣшитися и со Христомъ быти. Тако въ немъ воспламенится огнь любве Божія, и отъ тоя жертвы изъ пепла смертна произыдетъ червь, души благословенныя, иже въ послѣднее воскресеніе паки опернатѣетъ, и въ новаго феникса преложится, никогда же обетшати и умрети имущаго. Прочее же да не отлагаетъ никтоже созиданія гнѣзда своего къ годинѣ смерти, да не како и времене и гнѣзда лишится, якоже юродивыя дѣвы не обрѣтоша времене торжища, и масла, еже купити е на украшеніе свѣтильникъ своихъ. Мудрыя всякъ да подражаетъ дѣвы, яже благовременно стяжаша масло, и украсиша свѣтильники си (своя) и во чертогъ небесный быша впущены.

Мудрымъ дѣвамъ уподобися новопреставшаяся раба Божія, блаженныя памяти Благородная Царевна схимонахиня Анѳиса; готова выну бяше на пришествіе смертнаго часа, поминаше послѣдняя, устрои душевный домъ свой благочинно. Вооружися Тайнами Божественными душеспасительно, взятъ крестное оружіе на діавола, видящи, яко того трепещетъ и трясется, не могій воззирати на силу его, взяла есть и свѣтлыя каменцы молитвъ святыхъ, яже безпрестанно на враги своя изъ пращи устъ своихъ вергающи, якоже Давидъ на Голіаѳа, удобь побѣдила гордыню ихъ; украсила и ложе си (свое), яко фениксъ гнѣздо свое древесы и цвѣты добродѣтелей благовонными; украсила ложе, егда, яже чрезъ все житіе си прилежно храняше добродѣтели, тыя много паче усугуби, возлегши на одрѣ болѣзни послѣднія; болѣзноваше бо плотію, но духомъ бодра бяше: изнемогаше тѣломъ, но душею праведною отъ силы въ силу добродѣтелей поступаше; въ болѣзни терпѣніе сохрани, и благодарствіе Господу Богу о ней воздаяше; нищимъ неоскудно милостыню даяше; молебны часто ко Господу Богу и Пречистѣй Богородицѣ пѣти тщашеся; и іереи Божія и монашествующая ущедрила есть; и согрѣшшимъ ей прощеніе дарова; со всѣми миръ и любовь сотвори и обрати очи сердца своего ко истинному Солнцу, егоже любве теплотою возгорѣвшися, предаде душу свою праведную въ руцѣ сотворшему ю Господу.

Остави здѣ пепелъ плоти, да земля въ землю обратится, но блаженная душа жива отъиде, яже имать, внегда послѣдней трубѣ возгласити, паки плотію облещися, яко фениксъ червь, и во вѣки безсмертно пребывати.

Отъиде блаженною душею своею вчера ко Господу, нынѣ же отходитъ отъ насъ и тѣломъ въ жилище гробное, идѣже есть домъ всякому смертну.

Отходящи же, рада бы Вашему Царскому Благочестію и всѣмъ людемъ, собравшимся здѣ, послѣднее дати цѣлованіе, но смерть немилосердая связала есть языкъ и уста запечата, яко немощи ей глаголати.

Тѣмже нашея мѣрности устъ и языка вмѣсто своихъ употребляетъ и даетъ вамъ послѣднее цѣлованіе.

Во первыхъ, Вамъ, Благочестивѣйшимъ Царемъ Государемъ и Великимъ Княземъ, Іоанну Алексѣевичу и Петру Алексѣевичу, всея Великія и Малыя Россіи Самодержцемъ, и Благороднымъ Государынямъ Царицамъ, и Благородному Государю и Великому Князю Алексію Петровичу, и Благороднымъ Государынямъ Царевнамъ, яко любезнымъ и кровнымъ своимъ сродникомъ, даетъ послѣднее цѣлованіе, и яко Богоизбранная святая дѣва Благородная Царевна и Великая Княжна схимонахиня Анѳиса, подаетъ вамъ благословеніе, благодарствіе же творитъ Вашему Царскому Величеству о всѣхъ благихъ Вами содѣянныхъ ей, о любви сроднической, о понесеніи едва не всегда въ болѣзнехъ немощей ея и о почитаніи присномъ, яко во всякомъ призорствѣ и пріятствѣ любезномъ имѣете ю.

Таже и прощенія проситъ у Васъ, аще предъ Вами что, яко человѣкъ, согрѣшила есть.

При семъ молитъ Вашего Царскаго Величества пріятную любовь, да пособствуете ей схимонахинѣ Анѳисѣ теплыми молитвами, частымъ поминаніемъ, подаяніемъ милостыни, во еже бы тѣхъ ради благотвореній милость ей получити отъ Господа и въ державу нищихъ пребогатую водворитися, си есть, въ царство небесное, по словеси Господню: блажены нищіи духомъ, яко тѣхъ есть царство небесное.

Также цѣлуетъ Вашу Царскую сродную ей свѣтлость, во исполненіи дней своихъ, яко всѣмъ любезная мати Вамъ прощеніе дарующи и увѣщеваетъ матерски Васъ, да во страсѣ Божіи растуще и вразумляющеся въ законѣ Господни, старѣйшія въ родѣ Вашемъ почитаете, и да притекаете всегда во храмъ святый Господень, благодарити общимъ моленіемъ Бога; да живете благочинно, Церковь святую и благочестивую Вѣру отъ враговъ злочестивыхъ и еретиковъ проклятыхъ защищаете присно. Тѣмъ бо отъ Христа Бога милость, отъ всѣхъ же на вселеннѣй народовъ пріобрящете славу и честь премногу, и въ царствѣ небесномъ жизнь вѣчную.

Напослѣдокъ цѣлуетъ васъ всѣхъ благородныхъ и ближнихъ людей, Ихъ Царскому Величеству предстоятелей и служителей вѣрныхъ, и православныхъ христіанъ, всѣхъ духовныхъ и мірскихъ, ихже любовь святая собра нынѣ во храмъ сей Божественный, еже послѣднюю ей службу въ погребеніе тѣлеси отдати; благодареніе даетъ вамъ о любви сей, прощенія умильно проситъ и молитвъ святыхъ желаетъ, да тѣми душу ея поведете въ царство небесное, якоже тѣло во храмъ вводите и въ землю провождаете.

Она паки, аще вашими святыми молитвами пособствуема въ свѣтлыхъ водворится жилищахъ, равную возмѣритъ вамъ мѣру; непрестанно хощетъ о всѣхъ васъ прилежныя молитвы о благоденствіи и многолѣтномъ пребываніи вашемъ возсылати ко Богу, въ Троицѣ Святѣй славимому отъ всѣхъ силъ небесныхъ и отъ всѣхъ родовъ во безконечныя вѣки. Аминь.

Примѣчаніе:
[1] Святѣйшій Патріархъ Адріанъ правилъ Россійскою Церковію съ 1690 по 1700 годъ.
[2] См. Огласительныя и Тайноводственныя Поученія св. Кирилла Іерусалимскаго; оглашеніе 18-е.

Источникъ: Слово на погребеніе Государыни Царевны и Великія Княжны, схимонахини Анѳисы, бывшія Анны Михайловны, говоренное Святѣйшимъ Адріаномъ Патріархомъ Всероссійскимъ, Октября 29-го дня 1692 года. // Журналъ «Христіанское чтеніе, издаваемое при Санктпетербургской Духовной Академіи». — СПб.: Въ Типографіи Ильи Глазунова и К°, 1841. — Часть IV. — С. 119-134.

/ Къ оглавленію /


Наверхъ / Къ титульной страницѣ

0